باقى الغرام
بعد التحيه و السلام
خدى أخر كلام
لملمت باقى الغرام
تبلته بالنفتلين
لفّيته بالقطن و الشاش
فوق الشاش كتّان متين
صنعت من قلبى تابوت
و جبت صوره ليكى
و صوره تانيه لوشى الحزين
خليتهم فى وش بعض
حفرت جوف الأرض
و حطيت التابوت
جوّى التابوت
موميا إسمها باقى الغرام
و حطيت صورتى وصورتك
نجمتين عشقوا الظلام
ردمت فوقهم تراب
و أخر عهد الهوا
خدى منى إعتراف
أول غرامى كنّا سوى
قلبى يومها كان بيحبى
على إيدك عِرف الغرام
على إيدك عشق و داب
من إيدك شِرب الهيام
أحلا شراب
من عينك طلعتله شمس
و هزّه عنفوان الشباب
مشا معاكى الطريق
ما حسبش أى حساب
طريق إتفرش تعاتير
يقع و يقوم و يقع
تنهش فى لحمه كلاب
و لما حس بقبضتك
بتسيب معصمه قام ساب
القلب اللى كنتى دفاه
من كتر الوجع شاب
دفنت التابوت وخلاص
ماعدش عندى عتاب
باقي الغرام ..للمبدع / شحاته علي ابودرب
